নিবিড় প্ৰণয় গাৰে’ৰ—নীলা খামৰ চিঠি

প্ৰতি,

মৰমৰ ভাইটি জিতু (ধুন)            

তাং১৫/০৪/২০১৫

        মৰম ল’বা। ৰঙালী বিহু আৰু নতুন বছৰৰ হিয়াভৰা মৰম যাছিলোঁ। আমাৰ আটাইৰে ভাল। আশাকৰোঁ তোমাৰোঁ ভালেই নিশ্চয়। জানা ধুন মাৰ অলপ জ্বৰ। বয়সো হৈছে দিয়াচোন। কাণখনো অলপ গধুৰ হ’ল। তথাপি মায়ে আজিও পাহৰা নাই৷

         ব’হাগৰ ১ তাৰিখ তোমাৰ ওপজা দিন। তোমাৰ চৌব্বিশটা বসন্তৰ এই মধুৰ ক্ষণত তোমালৈ বহুত বহুত মৰম জনালোঁ। তুমি হয়তো পাহৰিছা মা-দেউতা মুন দা আৰু জুনু (পুতু) ভন্টীৰ মৰমৰবোৰ। আজি ময়ো উপলব্ধি কৰিছোঁ বহু কথা। পিতৃ-মাতৃয়ে নিজৰ সন্তানবোৰৰ কাৰণে কিমান ত্যাগ কৰে। মোক কেৱল পঢ়াৰ বাবেই আজি ছাব্বিছটা বসন্ত এৰি দিলে ঘৰৰ বাহিৰত। তথাপি আজি ঘৰত থাকি বুজিবলে পাৰিছোঁ মা-দেউতাৰ বিষাদৰ চকুপানী। জানা তুমি গুচি যোৱা দিনৰেপৰা ঘৰখন অচল হৈ পৰি আছে। মাৰ ৰোগবোৰো বৃদ্ধি হৈছে। সদায় তোমাৰ কোঠালীৰ ফটো কপি চালেই হুক হুকাই। টিভিত কেতিয়াবা বোমা বাৰুদৰ কথা ক’লে মা-দেউতা আনকি মোৰো গাৰ নোম শিয়ৰী উঠে। তুমি কিয় এনে কামত লিপ্ত হ’লা মই আজিও সাঁথৰ হৈ ৰওঁ। তোমাৰ কিহৰ অভাৱত মা দেউতা পুতুৰ হৃদয়ত দুখ দি আঁতৰি গ’লা। তথাপি আজিও ঘৰখন বা ময়ো ককায়েক হিচাপে তোৰ দায়িত্ব পাহৰা নাই। তুমি যিমান সোনকালে পাৰা গুচি আহা। এটা কথা মন কৰা দেউতা আশী বছৰ বয়সতো এইহেন প্ৰৰখৰ ৰ’দত বাল্টিত পানী ভৰাই গৰু পানী খুৱাইছে। মই কৰিবলে লওতেই না কৰি নিজেই কৰি লৈছে। গুৰুত্বপূৰ্ণ কথা এতিয়া মা-দেউতাক বিশ্ৰাম দিয়াৰ সময় নিতান্তই প্ৰয়োজন। ময়ো এতিয়া চাকৰি সূত্ৰে ঘৰত সময় দিৱ নোৱাৰোঁ। তুমি আহিলে মা’ৰ চলচলীয়া চকুহাল অলপ তত পাব। পুতু ভন্টিকো বিয়া দিয়া হ’ল।

           বেছি নিলিখোঁ৷ চিঠিত সকলো কথা লিখিব নোৱাৰি। ককায়েকলৈ, মা-দেউতালৈ যদি মৰম আছে অতি সোনকালে ঘৰলৈ অহাৰ ব্যৱস্থা কৰা। তোমাৰ যদি আহোতে কিবা অসুবিধা হয় তেন্তে এই ফোন ( 943586****) নম্বৰত ফ’ন টা কৰিবা।

ইতি

তোমাৰ দাদা-

“মুন”নিবিড়