১৪ অক্টোবৰ, নতুনবজাৰঃ মাজুলী তথা অসমৰ জনপ্ৰিয় ঘোষক দীপক বৰুৱালৈ সামাজিক আৰু সাংস্কৃতিক অনুষ্ঠান “সাঁকো”ৱে ২০২৩ বৰ্ষৰ ‘কথাকণ্ঠ’ বঁটা প্ৰদানৰ আনুষ্ঠানিক সিদ্ধান্ত গ্ৰহণ কৰিছে। মাজুলীৰ কমাৰ গাঁৱত জন্ম গ্ৰহণ কৰি সুদীৰ্ঘ সময় সমাজ আৰু সাংস্কৃতিক জীৱনৰ কল্যাণৰ হেতু কৰ্মসাধন কৰি থকা শিল্পী দীপক বৰুৱাই বৰ্তমানলৈকে মাজুলী তথা অসমৰ বিভিন্ন মঞ্চত সূত্ৰধাৰ হিচাপে দায়িত্ব পালন কৰি ৰাইজৰ মাজত জনপ্ৰিয়তা অৰ্জন কৰি আহিছে। শিক্ষকতাৰ দৰে গুৰু দায়িত্বত থাকিও বৰুৱাদেৱে সময়ৰ সুৰুঙাৰে ভাওনা, ৰাস, নাম, সকাম আদি কাৰ্যসূচীতো নেতৃত্বত থাকি সমাজ নিৰ্মাণত ভূমিকা গ্ৰহণ কৰি আহিছে। সকলো বাদ্য বজোৱাত পাৰ্গত এইগৰাকী শিল্পী এগৰাকী নাট আৰু সংগীতৰ পৰিচালকো। বিভিন্ন অনুষ্ঠান পৰিচালনা কৰাত পৰিপক্ক তথা সিদ্ধহস্ত এইগৰাকী ঘোষক দীপক বৰুৱাক সাঁকো সাংস্কৃতিক আৰু সামাজিক অনুষ্ঠানে ‘কথাকণ্ঠ’ বঁটা ২০২৩ প্ৰদানৰ বাবে সিদ্ধান্ত লোৱাত মাজুলীৰ বিভিন্ন দল সংগঠনৰ লগতে শ্ৰীবৰুৱাৰ বন্ধু মহলেও আনন্দ প্ৰকাশ কৰিছে। অহা ২১ অক্টোবৰত যোৰহাট বিজ্ঞান কেন্দ্ৰ আৰু তাৰকাগৃহৰ প্ৰেক্ষাগৃহত এক গাম্ভীৰ্যপূৰ্ণ পৰিবেশত দীপক বৰুৱাই এই বঁটা সাঁকো পৰিয়ালৰপৰা গ্ৰহণ কৰিব।
